الشعب ثاير

الشعب ثاير يا مبارك
و عيونه مليانه انتقام
فى كل شارع الشعب طالع
يطالب باسقاط النظام

ايوة مش عايزين جنابك
قولناها بعد سنين سكات
من النهاردة مفيش مبارك
كان ليل طويل عدى و فات

الشعب قال تغيير و قاصد
اول الدولة و اخرها
و انت برده لساك معاند
يا عم هاتها من قاصرها

ارحل و يلا حصل عيالك
مستني بعد ده كل ايه
اوعي يكون لسه فى بالك
ان انت ريس او حتى بيه

انت اخرك فى التاريخ حاكم جبان
تلاتين سنة يقتل و ينهب
حواليه تلاقي كام أ ُلعبان
علي الشعب دايما كان بيكدب

هنسيب تاريخنا ف يوم يحكامك
و راح تكون ازبل ما فيه
تلاتين سنة طوق ف رقبتك
شوف بقي هتقوله ايه

ابقي خلي العادلي يأمر باعتقاله
او خلي عز يحاول يشتريه
او هدده انك هتحرمه من عياله
مش هو ده اللى انت متعود عليه

اصحي و فوق بقي من جنونك
مصر قالت لاءه ليك
مصر خرجت من سجونك
خارجة تتحسبن عليك