نظرية العين الصحيحة

نتكلم النهاردة عن نظرية جديدة و هى نظرية العين الصحيحة
و النظرية دى مفتاح لغز الحياة و سر تفادى المشاكل كبيرها و صغيرها
و نص النظرية دى بيقول
"لا ترى الأشياء كما تريد أن تراها
و لكن لابد أن ترى الأشياء كما هى "

حد هيقولى يعنى إيه الكلام الكبير ده أنا اقوله لا كبير و لا حاجة
يعنى ببساطة الواحد لازم يشوف كل حاجة زى ماهى على طبيعتها
يشوفها بالفسلسفة العامة المجردة لأنه بكدة هيقدر يحكم عليها صح أوى
أما لو الواحد شاف اللى هو عايز يشوفه هتبقى مشكلة كبيرة لأنه مش هيشوف
الحقيقة و حقيقة الأشياء و هيتصدم فيها و فى حقيقتها آجلا أم عاجلا


وزى ما اتعودنا

مثال 1 : أنا لو بحب واحدة رقاصة - و دى كناية عن سوء الخلق -
مع كامل احترامنا للأخوات الرقاصات ................. المهم
دايما هقول لنفسى " ده هى كويسة .. مغلوبة على أمرها
ده هى من جواها طيبة " و هقعد أشوف اللى انا عاوز أشوفه
و مش هشوف الحقيقة زى ما هى هحاول أخلق منطق صح
عشان اقتنع بحبى ليها


مثال 2: لو عندى ترم مواده صعبة جدا جدا و عاوزة مذاكرة
و أنا قولت لنفسى " ياعم ذاكر تنجح غش تجيب تقدير
ما الواد حسين طول السنة بيلعب و فى الكافيتيرا و فى الاخر
بيجيب تقدير " هقعد أبرر لنفسى و اشوف ان المذاكرة مش مهمة
لحد فى الاخر ما هلاقى نفسى طبعا ساقط و ساعتها أشوف الحقيقة

فالواحد لما يشوف الحقيقة من الأول من غير ما يفرض رؤيته على نفسه
و يشوف الأمور بشكل محايد و يشوفها زى ما هى مش زى ما هو عاوز
مش هيبقى فيه صدمات و لا مشاكل
أشوفكم البوست - الرسالة - الجاي

و كــلــه بـالــعــقـل

ملحوظة // هذه هى رؤيتى الشخصية المتواضعة فى الحياة من واقع حياتى
و حقوق الفكر محفوظة 2009